Bewys van die Hemel

Titel: Bewys van die Hemel
Subtitel: 'n Neurochirurg se reis na die hiernamaals
Skryver: Eben Alexander
Genre: Hersiening
Uitgewer: The Penguin Group (South Africa)
Kaapstad, Suid-Afrika 2013
ISBN 9780143538349 / 978-0-14-353834-9
Sagteband, 14 x 22 cm, 192 bladsye

Beskrywing:

Bewys van die Hemel is 'n aangrypende verhaal, uniek in die literatuur oor geestelike ervarings, wat die manier waarop ons ons rol in die heelal verstaan, mag verander. Na jare se hantering van pasiënte met breinbeserings het verskeie neurochirurge nog altyd gewonder wat afspeel in die gees van die komateuse pasiënt. Hierdie belydenis van 'n nabydood-ervaring is 'n boeiende verhaal. Die feit dat die outeur 'n neurochirurg is, bring net soveel meer intrige na die boek. Naby-dood-ervarings, of NDE’s, is iets waaroor groot meningsverskille bestaan. Duisende mense het dit al ervaar, maar die meeste wetenskaplikes voer aan dat dit onmoontlik is. Dit was ook die mening van dr Eben Alexander. As hoogs opgeleide neurochirurg, wat gedurende sy loopbaan breinoperasies op talle pasiënte uitgevoer het, het Alexander geweet dat dit wat gelowiges die “siel” noem, maar net ’n produk is van chemiese prosesse in die brein.

Sy verklaring vir NDE’s sou sonder twyfel wees dat dit vir die betrokke persoon voel asof dit werklik gebeur het, maar dat dit eintlik maar net verbeeldingsvlugte is van die brein wat onder geweldige druk verkeer. Toe, uit die bloute, word dr Alexander self die slagoffer van ’n uiters seldsame breinsiekte. Dié deel van sy brein waar denke en emosie gesetel is, wat ons menslike bewussyn bepaal, het heeltemal tot stilstand gekom. Sewe dae lank het Alexander in die hospitaal in ’n diep koma gelê. En net toe die dokters dit begin oorweeg om sy behandeling te staak, gaan sy oë oop. Hy was terug. Alexander se herstel is mediese gesproke ’n wonderwerk. Maar dit is nie die grootste wonderwerk van sy verhaal nie. Terwyl sy liggaam in ’n koma was, het Alexander op ’n reis tot ver buite die grense van hierdie wêreld gegaan en ’n hemelse wese teëgekom wat hom tot by die einders van buite-liggaamlike bestaan gelei het.

Daar het hy met die goddelike oorsprong van die heelal kennis gemaak en gekommunikeer. Hierdie verhaal klink na die vergesogte en wonderbaarlike verbeeldingsvlugte van ’n skrywer van fantasieverhale. Maar dit is geen fantasie nie. Voordat Alexander sy reis ondergaan het, kon hy nie sy kennis van neurologie met geloof in die hemel, God of die siel versoen nie. Daardie afwesigheid van geloof het ’n leemte gelaat wat nie deur professionele prestasie gevul kon word nie. Vandag is hy egter ’n dokter wat glo dat ware gesondheid slegs moontlik is as ons besef dat God en die siel werklik bestaan en dat die dood nie einde van persoonlike identiteit is nie, maar net ’n oorgang. Hierdie verhaal sou merkwaardig wees ongeag met die wie dit gebeur het. Dat dit met dr Alexander gebeur het, maak dit uitsonderlik. Geen wetenskaplike of gelowige kan dit ignoreer nie. Die lees van Bewys van die Hemel sal jou lewe verander.